නිසි සුදුස්සාට නිසි තැන ලැබුණූ අවස්ථාවක්
තෘතීයික හා වෘත්තීය අධ්‍යාපන කොමිෂන් සභාවේ සභාපති ලෙස මහාචාර්ය ජී.එල්. ධර්ම ශ්‍රී වික්‍රමසිංහ මහතා පත්කර තිබෙන බව වාර්තා වෙනවා. ජනාධිපති අනුර කුමාර දිසානායක මහතා විසින් මෙම පත් කිරීම සිදුකර තිබෙනවා.
ඒ ආකාරයට වසර 4 ක කාලයක් සඳහා මෙම පත් කිරීම සිදුකර තිබෙන අතර, ඒ මහතා තෘතීයික හා වෘත්තීය අධ්‍යාපන කොමිෂන් සභාවේ සභාපති වශයෙන් එම වසර 04 පුරා සේවය කිරීමට නියමිතයි.
මොරටුව විශ්ව විද්‍යාලයේ මහාචාර්යවරයෙකු වන ඔහු, පිලිපීනයේ මැනිලාහි අන්තර් රාජ්ය සංවිධානයක් වන කොළඹ ක්‍රමය මාණ්ඩලික විද්‍යායතනය 12 වන අධ්‍යක්ෂ ජනරාල්වරයා වශයෙන්ද, ආසියානු පැසිෆික් ප්‍රතීතන සහ සහතික කිරීමේ කොමිසමේ සභාපති වශයෙන්ද 2021 සිට 2024 දක්වා වසර 3 ක කාලයක් සේවය කළ අතර, එම තනතුරු දැරූ පළමු ශ්‍රී ලාංකිකයාද ඔහු වීම විශේෂත්වයක්.
තවද, ඔහු වෘත්තීය තාක්‍ෂණ විශ්ව විද්‍යාලයේ උපකුලපතිවරයෙකු වශයෙන්ද, මොරටුව විශ්ව විද්‍යාලයේ විවෘත හා දුරස්ථ ඉගෙනුම් මධ්‍යස්ථානයේ සභාපති වශයෙන්ද, මොරටුව විශ්ව විද්‍යාලයේ රෙදිපිළි හා ඇඟලුම් ඉංජිනේරු දෙපාර්තමේන්තුවේ අංශ ප්‍රධානියා වශයෙන්ද අධ්‍යාපන පරිපාලන තනතුරුවල කටයුතු කර තිබෙනවා.
මහාචාර්ය වික්‍රමසිංහ මහතා, කෑගල්ල පින්නවල මධ්‍ය මහා විද්‍යාලයේ ආදි සිසුවෙක් වන අතර, ඔහු මොරටුව විශ්වවිද්‍යාලයේ පළමු පන්තියේ ඉංජිනේරු ගෞරව උපාධිධාරියෙකි.
එක්සත් රාජධානියේ මැන්චෙස්ටර් විශ්ව විද්‍යාලයෙන් ආචාර්ය උපාධියද, ලන්ඩන් කලා විශ්ව විද්‍යාලයෙන් ඉගෙනුම් හා ඉගැන්වීම් පිළිබඳ පශ්චාත් උපාධි සහතිකය සහ ශ්‍රී ජයවර්ධනපුර විශ්ව විද්‍යාලයේ කළමනාකරණ පශ්චාත් උපාධි ආයතනයෙන් (PIM) ව්‍යාපාර පරිපාලනය පිළිබඳ ශාස්ත්‍රපති උපාධිය ලබා ඇති අතර, ඔහු ශ්‍රී ලංකා ඉංජිනේරු කවුන්සිලයේ වරලත් ඉංජිනේරුවරයෙකි.
ඔහු සිය උසස් අධ්‍යාපන වෘත්තිය ක්ෂේත්‍රයට සමාන්තරව රාජ්ය හා පෞද්ගලික ආයතන කිහිපයක අධ්‍යක්ෂ මණ්ඩල සාමාජිකයෙකු ලෙසද කටයුතු කර තිබෙන බව සඳහන් වෙනවා.
මේ අතර විවිධ රාජ්ය හා පෞද්ගලික අංශයේ උපාය මාර්ගික හා තාක්‍ෂණික කමිටුවල සභාපතිවරයෙකු සහ සාමාජිකයෙකු වශයෙන් පුළුල් වශයෙන් දායක වූවෙක් වෙනවා.
පර්යෙෂණ ප්රකාශන 70 කට වැඩි ප්‍රමාණයක් ප්‍රකාශයට පත් කර ඇති ඔහු, ඉන් 30 කට අධික ප්‍රමාණයක් ජාත්‍යන්තර සුචිගත කළ සඟරා ප්රකාශන වෙනවා.
පර්යෙෂණ සඳහා ඔහු දැක්වූ දායකත්වය වෙනුවෙන් එමරල්ඩ් ප්රකාශන සම්මානය, විද්‍යාත්මක ප්රකාශන සඳහා ජනාධිපති සම්මානය සහ විද්‍යාත්මක ප්රකාශන සඳහා ශ්‍රී ලංකා ජාතික පර්යෙෂණ සභා කුසලතා සම්මාන ඇතුළු ජාතික හා ජාත්‍යන්තර සම්මාන 18 ක් ඔහුට පිරිනමන ලදී. 2018 දී ලෝක අධ්‍යාපන සම්මේලනය සංවිධානය කරන ලද ශ්‍රී ලංකා අධ්‍යාපන නායකත්ව සම්මාන උළෙලේදී” අධ්‍යාපනය සඳහා කැපී පෙනෙන දායකත්වයක් ලබා දීම සඳහා වූ සම්මානය ද ඔහුට පිරිනමා තිබෙන බව සඳහන් වෙනවා.
