සංදර්ශණයකින් ආරම්භ වී අවසන් වුණේ පොරපිටියකින්
හිඟුරක්ගොඩ, දිවුලන්කඩවල ප්රදේශයේ පැවති සංගීත සංදර්ශනයක් අතරතුර ඇතිවූ කළහකාරී සිද්ධිය සම්බන්ධයෙන් මැදිරිගිරිය පොලීසිය විමර්ශනයක් ආරම්භ කර තිබෙනවා.
ඊයේ (14) රාත්රීයේ දිවුලන්කඩවල ජනාධිපති විද්යාල ක්රීඩාංගණයේ පැවති සංගීත සංදර්ශනයක් අතරතුර මෙම කළහකාරී තත්ත්වය හටගෙන ඇති බව සඳහන් වෙනවා. මෙම කළහකාරී තත්ත්වය හට ගෙන තිබෙන්නේ, ඒ සඳහා සහභාගී වන බවට ප්රකාශ වී තිබු ගායකයින් දෙපළක් සංගීත සංදර්ශනය සඳහා සහභාගී නොවීම හේතුවෙනි.
ගායක ගායිකාවන් පිරිසකගේ සහභාගීත්වයෙන් එම සංගීත සංදර්ශනය පැවැත්වෙන බවට සංවිධායකයින් විසින් ප්රචාරක කටයුතු සිදුකර තිබී ඇති අතර, ඒ සඳහා රුපියල් 1,000 සහ 2,500 ලෙස ප්රවේශ පත්ර අලෙවි කිරීමට ද පියවර ගෙන තිබෙනවා.
ඊයේ රාත්රීයේ සංගීත සංදර්ශනය ආරම්භ වී ඇති අතර, ඊට සහභාගීවීමට නියමිතව සිටි ගායකයින් දෙපළක් පැමිණ නොමැති බවත්, ඒ අනුව සංගීත සංදර්ශනය අවසන් කරන බවට අලුයම 1.30 ට පමණ නිවේදකයා දැනුම් දීමත් සමග ප්රකෝපකාරී ලෙස හැසිරුණු පිරිස් ප්රසංගයේ පුටු ඇතුළු දේපළ මෙන්ම සංගීත කණ්ඩායමේ සංගීත භාණ්ඩවලට ද පහරදී අලාභහානි සිදුකර තිබෙනවා.
එම ස්ථානයේ ආරක්ෂාව සඳහා පොලිස් නිළධාරීන් 45 දෙනෙකු පමණ යොදවා තිබුණ ද ඇතිවූ තත්ත්වය පාලනය කිරීමට ඔවුන්ට ද නොහැකි වී තිබෙනවා.
සිද්ධිය සම්බන්ධයෙන් සිදුකළ විමර්ශනයේ දී අනාවරණය වී තිබෙන්නේ, ප්රසංගයේ සංවිධායකයින් විසින් පෙරොන්දු වූ මුදල ලබා නොදීම හේතුවෙන් අදාළ ගායකයින් දෙපළ ප්රසංගය සඳහා සහභාගී වී නොමැති බවට, මැදිරිගිරිය පොලීසිය සඳහන් කර තිබෙනවා.
